زاهر :- ماحد عم يفتح

عبود :- من شوي كنت احكي معها.. بتكون نامت المخلوقة

زاهر :- لازم تفتح وترد عليه

ابو رامي :- دق منيح ع الباب

زاهر : في كاميرات برا البناية

عبود :- اي في

زاهر :- مين بكون صاحبها وين فينا نلاقيه اكيد بكون في تسجيل

عبود :- طيب رح شوف رقمو وبجوز مايرد هلق صار الوقت تقريبا ليل

ابو رامي :- دقلو بسرعة

جنة :- العما ممكن الكاميرا تكشفنا

هادية :- الله يكسرك ياعبود ع هالعملة ما اوسخك المصيبة اذا صاحب البناية فتح الكاميرا وشافك معي

جنة :_ دخيلك شو اعمل

هادية :- لازم نبعدهن بالشرطة هلق لنلاقي شي طريقة طالعك من البيت

جنة :- وبلكي الشرطة فاتت فتشت هون

هادية :- العما هاد ما حسبت حسابو.. اسمعي رح خبيكي بالسدة فوق صحيح كلا كراكيب بس حاولي تخبي حالك بين الاغراض وبحيث ما تبيني تمام

جنة :- كيف رح اطلع لفوق..

هادية :- انا بساعدك يالا ع السريع قبل ليفتحو الباب وقبل لتجي الشرطة..

جنة :- هادية بترجاكي

هادية، :- لا تخافي ع مهلك اطلعي

جنة :- كلا جرادين

هادية :- بنتي حاولي خبي حالك مؤقت

جنة :- تمام هيك..

هادية :- يالا رح دق للشرطة.. حاولي ماتعملي صوت.. الووو مرحبا سيدي انا هادية العباس ساكن بعمارات الجازي بالطابق الثالث.. من دقايق لهلق في عالم عم ادق على بابي واغراب وانا مابعرفهن ووجوهن كانهن عصابة دخيلك انا ست وحدانية ومالي حد غير الله ومن ثم انتو.. ماقدرانة افتح الباب .. اي هني ع الباب مابعرف شو بدهن.. لا تتاخروا لا تتاخروا.. اي مارح افتح الباب اكيد بس انا خايفة يكسرووه..

...

جنة :- هادية

هادية:- شبك.. دقيت ع الشرطة لا تنادي عليه

جنة :1 هادية عم انزف

هادية :- شو هالحكي

جنة:- ومعي اوجاع الدني كلا

هادية :- عم تنزفي ياويلي ع قلبي اكلتي رعبة مرتبة حاولي تكمشي حالك ولا اطالعي صوت هاي الشرطة شكلا صارت تحت..

..

الشرطة :- مين انتو

زاهر :- نحنا

عبود :- انا ساكن فوق وهاد اخي وخالي.. مرت اخي اجت لعنا زيارة هون وفجاة اختفت عم نشوف بالكاميرات كانت الست يلي تحت هي يلي حاكيه معها ومن بعدها نزلت معها عم اندقلا لنسالها ماعم ترد

الشرطة :- افتحي

زاهر : شفتا طلعت بالبيت انا كنت متاكد

هادية :- اي سيدي

زاهر :- وينا مرتي

هادية :- مين مرتك مين انتو وشو بدكن مني باخر هالليل

ابو رامي :- بنتي يلي كنتي من كم يوم عم تحكي معها.. شفتك بكاميرا تبعت البيت

هادية :- انا بحكي مع كل الجيران شو بعرفني مين بنتك ومين مرتك.. انا يلي حكيت معها هي مرت الاخ هاد ( عبود) وسالتني وينو قلتا ترك البيت من كم يوم والمخلوقة راحت بحال سبيلهاا..

الشرطي :- طيب تعو ع المخفر اعملو الاجراءات هونيك وبنسمع اقوالكن..

عبود :- ليكو صاحب البيت اجا.. استاذ رباح عنا قصة وبدك تحلها..

استاذ رباح :- اتصالكن قلقني قلت في شي.. خير سيدي في شي بالبناية

الشرطي :- هادول مستأجرين عندك

استاذ رباح :- اي الاخ عبود والست هادية بس هادول مابعرفهن..

عبود :- هاد اخي وخالي

استاذ رباح :- اتشرفنا بس في شي صاير شي انسة هادية

هادية :- والله علمي علمك عم يقولوا ضايعة مرتو لهاد وانا ماني متذكرة مين بتكون وكل يلي حكيت معها مرة وحدة او مرتين ومابعرف شو قصتهن عم يدقوا اخر الليل عليه رعبوني..

زاهر :- بدي نشوف كاميرات البناية

استاذ رباح :- اي بنشوفها بس هاي كل اسبوع الكاميرا بتمحي القديم من حالها..

زاهر :- اي ماصرلا مرتي اسبوع بجوز

استاذ رباح :- مع اني ماني فاهم شي بس اي شرفوا ع المكتب تحت لنفتحها..

الشرطي :- مابصير نفتح كاميرا الا اول شي نسمع اقوالهن ومين هي الست يلي ضايعة.. ضروري نفتح ملف باللي عم يصير..

استاذ رباح :- اي هو هاد الصح..

زاهر :- بس ياسيدي مافي وقت

الشرطي:- عمي هاي اجراءات وضروري ناخد هوياتكن ونسمع الاقوال.. اتفضلو معي..

هادية :- ولازم اجي انا ياسيدي

الشرطي :- اي اكيد اتفضلو معنا اذا بتريدو

زاهر :- ( بهمس بيحكي مع عبود..
اذا فتحو ملفي وشافو عندي سوابق بدي اقتلك ع ايدي اطلع دبرها..

عبود :- سيدي انا جاي احط الاقوال واخي بدو يضل هون بجوز تجي لهون فجاة..

ابو رامي :- انا بقول هيك انا ابوها وبحط اقوالي

الشرطي :- من الافضل يجي كمان زوجها

ابو رامي :- انا بجي بالاول ومن اخلص بجي مكانو وهو بقدم اقوالو

الشرطي :- طيب اتفضلو

هادية :- ماشي لكان انا رح احط ملايتي واجي..عن اذنكم..

...

في الداخل.. وبصوت خفيف..

هادية :- جنننة.. ججنة..

جنة :- عم موت عم موت

هادية :- يالطيف شو هاد عم تنزفي وصارت تحتك بركة دم

جنة :- ماقدرانة هادية

هادية :- شو رح اعمل انا انا لازم روح هلق للشرطة وهاد زاهر رح يضل بالبناية ومافيني خرجك ابدا وبدهن يراقبوا الكاميرات بدي شوف طريقة اطالعك فيها.. المهم انتي انزلي تعي اساعدك تعي..

جنة :- واذا فاتو يفتشو البيت

هادية :- رح ابعتلك حدا يساعدك بس انزلي وماتفتحي لحد الا من دق انا ع التلفون واخبرك..

جنة :- شو اعمل..

هادية :- غسلي وغيري تيابك وانطريني ما بطول.. تعي لاساعدك.. ع مهلك ع مهلك..

جنة :- خايفة

هادية :-لا تخافي اللي مكتوب بدو يصير ومافي منو هروب.. رايحة اشوف طريقة وراجعة.. المهم لا تحاولي تظهري صوت او تفتحي الباب لحد.. هاد فوق ابن الحرام..

...

بعد مرور ساعتين .. وبعد انهاء اجراءات الشرطة

هادية :- استاذ رباح خدني معك

استاذ رباح :- اي اكيد تفضلي ست هادية.. شو هالقصة الملغوصة كيف واحد بيترك مرتوا عند اخوه لحالو. وبقول انها مرتي..

هادية :- كذابين تعرف البنت عمرها صغير. قالو عمرها 17.. وهي اقل من 14..

استاذ رباح :- شو هالحكي

هادية :- انا شفتها بعيوني طفلة صغيرة..

استاذ رباح :- هلق بنشوف بالكاميرا واخلص من هالسيرة..

هادية :- هي الشرطة لاحقتنا

استاذ رباح :- بدي روح انا وابوها بالاول انشوف الكاميرا اذا ظهرت بنتو بنعطي خبر للشرطة وبيجو ياخدو التسجيل..

هادية :- اسمع بدي قلك شي بس غلات اولادك ماحد يعرف..

استاذ رباح :- شو في ست هادية

هادية :- البنت من القصر ومزوجينها لهاد زاهر اكبر منها بشي 18 سنة وغصب عنها والطفلة مابلغت حتى.. هاد ابوها عندو عقلية سيئة.. والبنت بدهن يقتلوها..

رباح :- شو هالحكي ليش ماقلتيه للشرطة

هادية :- كنت بدي قول بس البنت وضعها صعب..

رباح :- شو عرفك بهاد كلو ست هادية

هادية :- والله البنت وضعها صعب وحالها بالويل وكمان بجوز تكون حامل لان الدكتورة قالت في كيس حمل.. عندها كيف مابنعرف وهي مابلغت.

رباح :- مافهمت شي ياهادية..

هادية :- رح فهمك انا.. هاي البنت من فترة عم يجيبها عبود وفكرتا مرتوا وهو قال مرتوا ماخطر ببالي فكرتا اختو الصغيرة وراحت الايام وهو اجا سال عنها وكانو فقدها وبعد بفترة مانها قصيرة اجت البنت كان حالها بالويل وجها اصفر وكانها عم تموت.. اخدتا لعندي وحكتلي قصتها.. وهاد عبود وصخة مصورها بصور مو منيحة مشان اخوه اخد منو حبيبتو وعم يعمل هيك ند بند.. وبقيت البنت عندي مخبيه والله شفقت ع حالها وهاد ابوها جاي يقتلها الظاهر لان لالها صور مو منيحة

رباح :- يالطيف والله حسيت من وجوهن انهن ناس همج.. وانتي ياهادية شو دخلك بالقصص هاي انتي بغنى عن هالمشاكل مو بكفي يلي صار معك

هادية :- مابقدر يا رباح هاي طفلة والله قلبي اتقطع عليها اخدتها متل بنتي..

رباح :- كان بلغتي الشرطة كان لازم ادخلت الشرطة

هادية :- البنت وضعها مو منيح ابدا وانت بتعرف الدولة هاد ابوها وجوزها معهن مصاري يعني اذا بيرشوا شي حدا بياخدوها والبنت تركتها وهي معها نزيف. وهلق اذا شافوا الكاميرات رح يشوفوا انها كانت معي ويكشفوا مكانها ددخيلك مالي غير الله وانت.

رباح :- الله يسامحك يا هادية هلق. شو رح اعمل اذا هني هلق ناطريني بكونوا بالبيت ليشوفوا الكاميرات.. انتي ناقصك هلق تفوتي بسين وجيم..

هادية :- فايتة ع عرضك وكرمك مالي غير الله وانت.. شو قلت.

رباح :- وهلق البنت فوق وهاد زوجها فوق.. يعني اذا كشف مكانها..

هادية :- بتروح البنت فيها

رباح :- طيب اسمعي انتي نزلي واطلعي اطمني عليها وانا بحاول لاقي طريقة من هون للصبح ما يشوف الكاميرات او امحي كل شي فيها..

هادية :- دخيل قلبك الله يستر ع بناتك

رباح :- هاد جهل وتخلف الناس مابيخلص.. ورح اتخلص من هاد عبود.. والبنت مالازم تبقى عندك مشان ما تتعرضي لقصص رح طالعك منها هلق وبكرة لازم توصليها للاحداثيات تمام

هادية :- اي ماشي اكيد..

..

ابو رامي :- كنا ناطرينك شبك اتاخرت

رباح :- انا اتاخرت على عيلتي وبكرة الصبح من بكير بكون هون وبفتح الكاميرات

ابو رامي :- لاء شو لصبح وما الصبح

رباح :- عمي فتح الكاميرات بدو معلم والشاب هلق نايم ومارح يجي بنص الليل ليفتحها.. وبعدين انا تارك بيتي وعيلتي وجاي واذا هلق ولا الصبح كلها ساعات.. بنحكي بكرة سلام.. وانت عبود.. رح افسخ عقد الايجار ازعاج الناس والبهدلة هاي مابحبها اذا بتريد جهز حالك لتسلمني مفاتيح الشقة..سلام..

هادية :- مابيجي من ورا الناس الا وجع الراس تصبح ع خير استاذ رباح..

ابو رامي :- اذا بعرف انو عندك خبر عن بنتي مارح ينوبك خير

هادية :- استغفر الله بشوف عم تهدد اخي بعد عن طريقي احسن ما دق ع الشرطة..

عبود :- خالي تعال نطلع لفوق

ابو رامي :- كلو منك.. هلق زاهر وين بتكون اراضيه

عبود :- طلع ما تاكل همو.. مارح يروح للشرطة

ابو رامي :- اي منيح ما تفوتوا السجن وما يطلع

عبود :- اي لا تخاف عليه بطالع حالو من الشي متل الشعره من العجين.. تعال اعملك فنجان قهوة ليطلع الصبح.

ابو رامي :- اطلع كلو من ورا تخبيصك وتخبيصوا.. بدي البنت فضحيتنا صارت ع كل لسان..

عبود :- رح جبلك اياها خلص المهم متل ماوعدتني نادية ترجعلي

ابو رامي :- انت جيب بنتي وخد نادية واهل نادية..

...

هادية :- جنة جنة فيقي فيقي شو عم يصير معك

جنة :- تعبانة ع الاخر

هادية :- الله يستر خدي اشربي مية.. ركزي بس معي شوي لازم نطلع من هون قبل مايطلع الصبح.. اسندي حالك... دقيقة رح رد ع تلفون صاحب البناية. اي استاذ رباح..

رباح :- جهزيها رح نزل قاطع الكهربا ووقت تطفي الكهربا بتنزلي بسرعة انتي وهي لعند سيارتي موجودة خلف البناية عند حاويات البناية صاففها تمام..

هادية :- اي اكيد

رباح:- اسمعي مافي وقت لان هاد عبود شاعل الاضاءات وبجوز يكونوا فايقين بدك تنزلي باسرع وقت..

هادية :- يالا نحنا جاهزين..

رباح :- توكلي ع الله..

(( نزل القاطع وسندتني هادية لانزل الدرج ماكنا شايفين شي غير ضو تلفون صغير شاعل.. ما وصلنا لاخر درج بالبناية الا فتح الباب وكان صوت ابي..

جنة :- هادية هاد ابي

هادية :- اسرعي اسرعي..

(( ماعرفت كيف صرت بالسيارة... كانت هادية معي متوترة وخايفة يصير شي..

استاذ رباح :- تمام هيك..

هادية :- شو عملت استاذ رباح

رباح :- لا حول ولا قوة الا بالله

هادية :- شفت كلامي صح طفلة صغيرة..

رباح :- الله يلعنهن.. نزلو لتحت شفتن رفع القاطع هاد عبود..

هادية :- ماحد شافك

رباح :- لاء واخدت تسجيلات الكاميرا كلا.. وين رح نروح هادية ع بيتي بهيك وقت مابقدر

هادية :- خدنا ع المشفى حال البنت سئ ع الاخر

رباح :- ع اي اساس رح ناخدها رح يفتحو محضر وسين وجيم والبنت مامعها اي اوراق وبجوز مايفوتوها ابدا

هادية :- طيب والحل

رباح :- مابعرف عندي رفيق بس طبيب بيطري مابعرف اذا بيفهم بهيك شي ليساعدها..

هادية : والدكتورة يلي بعرفها ماعندي رقمها الخاص.. بدقلا ع رقم العيادة وهلق العيادة مقفلة..

رباح :- ما النا الا هالحل خليني دق عليه لنروح هونيك..

(( انا يومها غبت عن الوعي ومافقت الا اني بغرفة وبايدي سيروم.. وكانت هادية جنبي غفيانة..

جنة : هادية هادية وين انا

هادية :- اها وين نحنا.. ااخ راسي رح تنفجر.. كيف صرتي احسن هلق. امبارح نزفتي كثير وحطينا سيروم.. دمك ضعيف وضروري ننقلك ع مشفى.. ذكرتيني اتصل ع الدكتورة.. لا تتحركي ارتاحي انتي..

جنة :- نحنا وين وشو صار

هادية :- عند دكتور ارتاحي انتي هلق بامان.. ليكو عم يدق.. الووو اي دكتورة والله بعتلك رسائل واتصالات كتير.. الوضع متازم اي نفسها وصار معها نزيف رح قلك شو صار معنا.. دخيلك الامور معقدة.. ع المشفى.. معقول يفوتونا.. تمام تمام اكيد..

استاذ رباح :- صباح الخير

هادية :- اي دكتورة ان شاء الله مابنتاخر هلق طالعين اي اي الله معك.. .. صباح النور استاذ رباح شو عملت..

استاذ رباح : مسحت كل المقاطع يلي ظهرتي فيها مع البنت و وضفت مقاطع من القديم لحالك. .. بس تعرفي شو شفت بالكاميرات..

هادية :-شو قلي

استاذ رباح :- هاد يلي شفتو امبارح زاهر فايت هو ومعو كم واحد ومعهن سلاح..

هادية :- شو هالحكي

استاذ رباح :- بعد شوي نزلوا ومعهن عبود ولحشوه بالسيارة..

هادية :- اي

رباح :- هاد تسجيل قديم.. منشي اسبوعين تلاتة.. وصلتو للشرطة بدون ماهني يشوفوه..

هادية :- رح يفيدنا بشي

رباح :- بجوز هني مافيا وعصابات.. وبجوز يقولوا مشاكل عائلية والاسلحة يلي معهن مرخصة..

هادية :- اها اتذكرت.. جنة خبرتني انو هاد زاهر مطلوب..وامبارح من اجت الشرطة ما قبل يروح يعطي اقوالو واخوه وخالو غطو عليه.. ومن رجعنا قولك يكون راح..

رباح :- لاء ما اعتقد لان سالني الصبح الشرطي عنو وقال ناطر اقوالو

هادية :- لكان هالملعون هرب.. وعمل هالفيلم امبارح مشان ماحد يكمشوا..

رباح :- طيب هلق شو نعمل كيف صارت

هادية :- فاقت شوي ورجعت غطت.. خلينا ناخدها ع الدكتورة..

رباح :- ماقدرنا اندبر وحدات دم.. مافي عنا الا هالمشوار.. بس ع العيادة

هادية :- لاء ع المشفى.. الدكتورة بدها ادخلها مشفى لتعمل لالها تقرير هالتقرير مهم لالها لان يعتبر اغتصاب وزواج اطفال مابعرف كيف بس هلق بنشوف..

رباح :- طيب يالا خلينا نمشي لان الوقت قليل ووضع البنت للماساوي اكثر..

هادية:- ساعدني من عندك

رباح :- اتركيها انا بحملها بس اكمشي انتي السيروم..

..

في المشفى..

هادية :- طمنينا عنها

الدكتورة :- تاخير صغير وكانت رح تروح من بين ايدينا.. دمها صار 7.. ووضعها سئ.. والجنين نزل.. هي هلق حطينا لالها وحدات دم.. بس الطفلة ع فكرة مبلغة يعني الحمل صاير ع بلوغ.. بس جسمها الصغير ما اتحمل..

هادية :- يعني كانت مبلغة

الدكتورة :- اي وبجوز هي خبت هالشي مشان اهلها مايزوجوها.. المهم عملنا الاجراءات والتقاير وهلق جاي ضابط لهون ورح ياخد اقوالكن ولازم ماتخبي شي هالطفلة بجوز اليوم او بكرة تكون تحت رحمتنا وبعدين من افعال اهلها تصير تحت رحمة ربنا.. لهيك ما تخبي شي هادية..

هادية :- اي اكيد اكيد..

(( مابعرف كم المدة يلي قضيتا بالمشفى.. بس وقت وعيت لقيت امي جنبي..

امي :- جنة فتحي عيونك يامو انا هون

(( ارجعت غمضتن من الخوف.. فكرت حالي ببيتنا وفكرت انو ابي اخدني... بعدا.. اسمعت صوت هادية فتحتن ومديت ايدي لالها..

جنة :- هادية

هادية :- اي حبيبتي انا هون لا تخافي انا جنبك ومعك وانتي بامان.. فتحي عيونك هاي امك جنبك..

جنة :- شو بدك مني

امي :- بنتي لا تخافي مني انا ماكان بايدي شي والله وماعرفت اتصرف بشي..

جنة :- هادية شو صار

هادية :- صار كل شي منيح.. لا تقلقي ارتاحي انتي وخلص..

.. قبل 3 ايام.

رباح :- هادية طلع هاد زاهر وصخة ع الاخر شغل مافيات ونصب ومطلوب فعلا

هادية :- يقصف عمروا الهي مريض نفسي كيف بتهف نفسو يستغل الناس الضعفاء.. سواء اهل نادية ولا هالبنت المسكينة..

رباح :- متفرعن الله لا يسامحو.. ولا ابوها شو هالمرض هاد

هادية :- المشكلة انو مو بس العيلة يلي هيك كل الضيعة..

رباح :- ان شاء الله يتحركوا هالمؤسسات ويوقفوا هالقرف عند حدو.. عم فكر والله افضح قصتهن واسرب كل شي..

هادية :- لاء حرام مشان هالبنت..

رباح :- الله يلعنهن ما هنوني يوم شو هالمصايب

هادية :- قولك اذا كمشوه لهاد زاهر شو حكمو

رباح :- ملفو اسود اذا مو ع قصة هالطفلة ع قصص النصب واستغلال الناس ..

وهادية :- وابوها

رباح :- حالو متل حال الناس الجهلة.. وجريمتو بتزويج بنتو قاصر.. بس مو حرام... كان بايدينا شي يدخلو بالسجن العمر كلو انو مزوجها دون بلوغ بس البنت طالعة مبلغة ومامخبره انقذت ابوها..

هادية :- لو هالدكتورة ماحكت

رباح :- مو بايد الدكتورة ضروري يكون التقرير صح.. ع العموم البنت عم تتحسن صحتها..

هادية :- ماقهرني الا امها جوا.. عم تبكي وتنوح ع شو.. وهي لالها ايد بحرق بنتها

رباح :- بسيطة لنشوف.. بضلا امها

هادية :- اي شو هالامهات يلي هيك كل مخها جهل وتخلف دمروا مستقبل الطفلة وحرقوه.. قولك شو مصيرها.. انا خايفة وجود امها مشان تاخدها

رباح :- الشرطي والاحداثيات قالت كل شي بايد البنت اذا هي شايفة رجوعها لعند اهلها في امان بترجع بشروط ما يتعرضوا لالها بشي وكل فترة وفترة بزروها.. واذا البنت مابدها اهلها رح ياخدوها للاحداثيات ليصير عمرها 18..وبعدها بقرروا مصيرها..

هادية :- وهاد زاهر رح يضل هيك مطلوب وماعرفانين يمكشوه ياخوفي يتعرض لالنا مادامو ابن حرام مصفى..

رباح :- كل شي بايدين ربنا المهم هاد عبود بدهن يدفعو لالو كفالة ليطالعوه..

هادية :- الله لايردهن كلهن وهاد ماقصر عبود الاناني خلص حبيبتو تركتو شو ذنب هالطفلة ياخدها خطيفة وحدة بوحدة.. اساسا هو يلي وصلها لهيك مكان

رباح :- بتعرفي بجوز الله بعتو ليخطفها ليطالعها من هالعذاب مابتعرفي شو كان مصيرها لو ضلت مع هالحيوان زاهر..

هادية :- بس تعبوها الله ينتقم منهن

رباح :- نصيبها هيك..

...

بعد 3 ايام..

امي :- اسندي حالك امي كلي لقمة

جنة :- مابدي شي

هادية :- هاتي انا بطعميها اسندي حالك جنة مشان صحتك حبيبتي

جنة :- مالي نفس

هادية :- كرمالي

جنة :- لا تتركيني هادية ومابدي روح معهن

هادية :- لا تخافي انا جنبك ومعك.. وماحد رح ياخدك.

(( كنت رافضة وجود امي مع انو دموعها ماكانت توقف كنت حس انو هي ماكان بايدها حيلة وكانت لازم تقبل متلها متل باقي نسوان الضيعة.. بلشت تتحسن صحتي وكانو ع طول يزوروني الاحداثيات.. ليطمنو عليه.. كانت هادية بهاي الفترة عم تجبلي كتب لاقرأ.. وعرفت انو مافيني ضل عندها لازم اختار مابين وجودي عند ابي او بالاحداثيات..

امي :- بنتي روحي ع الاحداثيات لا تنطري

هادية :- معقول قلبك من حجر مابدك تاخدي البنت عندك تحميها..

امي :- احسن لبنتي سدقيني اذا بقيت عندي اكيد ابوها رح يحاول يظهر انو بيعاملها منيح.. بس بعدها البنت بنظر ابوها متزوجة.. وزوجها زاهر وبجوز يرجعها لالو من تطبق السن القانوني للزواج.. لان هو احق من اي حد فيها انا بعرف بشو بفكر.. روحي بنتي وانا بجي لعندك وبجيب رامي روحي ادرسي وعيشي حياتك..

هادية :- 😣 شو هالحال ياربي

جنة :- رح يخلوني ادرس

هادية :- اي في مدرسة خاصة وبتخرجوا منها متفوقات ورح تلاقي رفيقات كتير متلك

جنة :- وانا شو رح يصير فيني بعدين

هادية :- رح تدرسي جامعة وتكوني دكتورة قد حالك وتعرفي شي رح استاجر شقة قريبة منك ووقت ماتحبي تعي لعندي ووقت مابدك بجي لعندك..

(( انتقلت للاحداثيات كنت غريبة عنهن بالاول اغلبهن من المدن ومقطوعين من شجر ايتام.. .. قصصهن كانت مختلفة شي يلي جبرها الزمن تسرق وشي يلي قتلت حدا وشي متلي اتعرضوا للاغتصاب.. كنت حسهن اقوياء اقوى مني.. بس حياتهن حلوة مجتمعين شي بيلعب وشي بيقرا وشي عم يرتب ويصنع او يخيط.. صحيح فقدت عيلتي واحلامي يلي كنت بحلم فيها بس بنيت حالي من هون من هاد المكان.. مرقت السنين كانت امي واخي يزروني.. ومرة اجا ابي لاسامحو بس حسيتو كذاب ثعلب مراوغ.. كان نفسي شي يوم زور قريتي واشوف شو صار فيها وشو تغير امي بتقلي انو الناس ماعادت تزوج بناتها وهني صغار او لقرايب.. بس بشكل عام هالشي.. لان في عائلات بعدها ع هاد الجهل والتخلف متل اهل رفيقتي غدير زوجو اختهم رسول من شي فترة قصيرة.. وهي بعدا صغيرة.. وماقبلانين يتخلو عن هالعادة.. غدير اسمعت انها انجبت بهاي الفترة 3 اطفال واثنين منهن معهن اعاقات عقلية.. والسبب زواجها من ابن عمها..امراض زواج الاقارب ماكان ينتهي رغم التطور..وانا من هون فتت جامعتي ومشي فيني الزمن لهاد اليوم.. لاكون قد حالي.. درست اجتماع وعلم نفس.. كنت احب اقرا هيك كتب.. واسمع قصص الناس واخبارهن.. وحاليا انا انتقلت لاعيش جنب هادية احن وافضل مخلوقة وقفت جنبي..

هادية :- تشربي معي فنجان قهوة

جنة :- اي اكيد وانا بعملها شو رايك

هادية :- عندي خبرين مابعرف اي خبر بيعجبك اكثر..

جنة :- اثنينهن حلوين

هادية :- يعني هيك شي

جنة :- اي بلشي لكان

هادية :- بتذكري قريبي المحامي مجدي ابن اختي حكتلك عنو الله يخليه من يوم يوموا كان يفقدني بكل مصاريفي وصية اختي الله يرحمها يدير بالو عليه.. المهم قبل ياخد قضيتك ليرفع قضية مخالعة لهاد زاهر طلاق غيابي.. وقال انو كل اللي صار معك بحق لالك اخد الطلاق فيها..

جنة :- يعني رح اتخلص من هاد زاهر

هادية :- اي بس سالت امك قالت رح تجيب الورقة يلي صار فيها زواج .

جنة :_ معقول امي بالاخر قررت..

هادية :- الورقة امك بتقول انها كانت مع جميلة.. وجميلة قبلت تعطي امك الورقة مقابل تتنازل امك لجميلة بأرض باسم امك بالضيعة

جنة :- العما شو هالحقارة

هادية :- اي معلش هي حقيرة لان عاشت مع عيلة حقيرة خليها تجيب الورقة وتصطفل منها لالهن..

جنة :- هاي الورقة بس بين ابي وهاد زاهر

هادية :- ماهو وكيلك كان يعني كنتي قاصر مابتقرري بشي وهاد لصالحك..

جنة:- هاد زاهر الملعون لهلق الشرطة ماعرفت مكانو

هادية :- امك سمعت من جميلة انو صار باوروبا هو وهاي نادية

جنة :- يعني ما ترك نادية لعبود

هادية :- لاء ما اعطاها لالو كلو فيلم بس.. وهاداك عبود لحقوا ع اوروبا ع قول امك ليدور عليه هونيك..

جنة :- شو هالعالم

هادية :- مابدك تسمعي الخبر التاني

جنة :- شو هو. خبريني

هادية :- بصراحة هاد الخبر مارح قولوا هلق بعد الطلاق بقولوا او بجوز مو انا اقولوا...

جنة :-دخيلك قولي لا تخبي عني شي

هادية :- والله كنت حابة قولوا بس قلت يطلع من صحابو احسن..

جنة :- احكي هادية

هادية :- لاء خلص مارح احكي شي..

(( ماقبلت هادية تحكي شي يومها.. ونسيت الموضوع لاجت امي وجابت ورقة الزواج من جميلة .. وكان هاد اول لقاء لالي مع مجدي.. كان عمري بيوما شي 24 سنة.. مجدي كان عمروا هون 29 سنة.. محامي ناجح وطموح.. ماكنت فكر باي شي لحظتا الا اني اخلص من زاهر بطلاق غيابي وبالفعل المحكمة الشرعية طلقتني طلاق غيابي وهون وصلت الورقة لابي يلي جن جنانو كيف اطلقت وصار عندو بنت مطلقة وكيف تم هالشي اللي لحد الان ماحد بيعرف انو امي هي يلي ساعدتني لاتخلص من زاهر...

هادية :- اي خالتي تعال ولو عاملتك احسن محشي ومو بس لحالي عملتو سدق انا وجنة.. اي لا تتاخر..

جنة :- هلق رح يجي..

هادية :- اي روحي شهلي حالك وغيري تيابك

جنة :- ليش شبني انا

هادية :- يابنت يعني مامعقول انتي... الشاب شايف وغشيان ومانو مسدق معقول ماحسيتي عليه..

جنة :- بلا بس يا هادية

هادية :- نفس موال كل مرة بتعرفي البير وغطاه اي بعرف البير وغطاه وهو قبلان بالبير وقبلان يكون غطاه حاجتك تتهربي الشاب رايدك وانتي كمان وانا شفت هالشي من نظراتكن سوا..

جنة : الله يسامحك هيك انا

هادية :- يعني بدك تخبي عليه شفتك من كم يوم عم تقلبي صفحتو بالانترنت وعم تقلبي بين الصور

جنة :- بس

هادية :- بس بس بس عم قلك هو شايف ومانو مسدق وانتي ماشاء الله ماناقصك شي..

جنة :- بس هو بيستاهل بنت مالمسها حد..

هادية :- وانتي البنت يلي هو بيستاهلها وحاجي تفكري كتير لانو هو ع الطريق وماعاد في وقت..

(( ومشي الزمن لاكون لشخص انا كنت بدي اياه وقبلتو بارادتي وبكيفي وبكل قوتي.. كانت البدايات مخيفة والذكريات لا تنتسى.. بس كانت الايام عم اداوي واتعالج قهر سنين. اللي بيريحني ع طول هو قوتي واصراري لاتحمل واكون بهاد المكان.. لاكون زوجة محبوبة واعية ومتعلمة واكون ام لطفلة عم علمها انها هي اساس الحياة وانها جوهرة غالية كثير ماحد يلمسها حتى لو لمعت بعيون الكل.. قصتي ماوقفت عندي بعرف انو في كثير قصص متلي وستات كثير انحرقت طفولتهن وماعاشوها.. وستات كثير وعيو ع الدني لقوا حالهن امهات وصار عندهن احفاد.. وبعدن بعمر صغير.. هالعادات مكانها ماكان بضيعة اهلي وبس.. هي متواجدة بكل مكان وبين زوايا كل بيت في قصص لامهات بتوجع القلب سواء اتزوجت صغيرة او اجبرت ع ابن عمها او قريب. لتتحسر بالاخر ع طفلها يلي اتاذى بسبب هالزواج.. وحاليا وقبل ما انهي القصة.. الورود يلي ببيوتكن بعدهن ماحان قطافهن.. بعدهن براعم صغيرة حتى لو ابلغوا واجسادهن اصبحت اجساد لعمر اكبر منهن.. بعدهن هالبراعم احساسيهن طفولية وعقلهن صفحة بيضا صغيرة... لا تفكرو بقطافهن الا وقت هني يقرورو بكامل ارادتهن.. اتركوهن يعيشوا زمنهن ولا تخافوا عليهن من انو يروح نصيبهم... تربية صالحة واشباع رغبات رح تنشا امهات صالحات وواعيات للزمن.. تربية ناقصة واستعجال بالزواج رح ينشا جيل امهات جاهل ومتخلف.و . محتاج وعندهن شعور قاتل بالنقص.. حتى لو اتزوجت بعمر صغير رح تشعر بعد سنوات زواج كثير انها كانت بحاجة لتعيش صباها وتعيش قصص الحب.. وحياتها رح تنقلب لخيانات وجحيم..وياما في قصص لزوجات بلشو يوعوا انهن ماعاشوا حياتهن رغم انها بتمتلك طفلين وتلاتة.. عواقب زواج القرايب والقصر كثير رح اترك التعليقات لتسردوا قصص لناس بتعرفوهن او سمعتو فيهن مصير حياتهن كانت للاسوء بسبب زواجهن لقرايب او بعمر صغير..

انتهت..