#نبض_الحياة

#نبض_الحياة

الجزء الخامس.........

ما فهمت ليش تيتا كان بدا ياني بعد عن عمر بس ما قدرت اتحمل كلامها وفتت عغرفتي بسرعة حتى قبل ما تكمل حكي انفجرت من البكا من دون سبب عم بتزكر الاحداث الي صارو معي بهاليومين مع عمر ما عندي القدرة اني اتركو مرة تانية ما قدرت استوعب

ام بكر. تولين معلش فوت
تولين. فوتي
ام بكر. ليه ما خليتيني كمل كلامي ..تولين انا حكيت هيك لمصلحتك
تولين. شو قصدك تيتا كيف يعني لمصلحتي ما فهمت عليكي
ام بكر. حبيبتي تولين فهمي عليي يا بنتي انا ما بدي ياكي تتعلقي بعمر ما عنا هالشي بدينا ولا بعادتنا ولا بتقاليدنا يا بنتي ازا هو عنجد بيحبك بيجي وبيخطبك وبتكتبو كتابكون وبتصيري حلالو
يا تيتة انا بتهمني مصلحتك ما بدي الناس يحكو علينا حكي طالع نازل فهمتي عليي يا بنتي
تولين. بس تيتا هو ما صرلو غير يومين جاي وما بدي يخطبني قبل ما اتخرج
ام بكر. بعرف تيتا بس قصدي لا تعطي وجه زيادة فهمتي عليي
تولين. خلص تيتا متل ما بدك

يمكن كان معا حق تيتا لما قالتلي هالحكي وانا ما كنت منتبهة عحالي نحنا هيك دائماً منضل عم نغلط ليجي حدا ويوعينا وينبهنا عغلطنا وهي فرصتنا الوحيدة لنصير احسن رح تستمر الحياة سواء ان غلطنا او لاء مشان هيك لازم نستغل هي الفرصة لنغير بحالنا

ومشت الايام يوم ورا يوم متل لمح البصر كل شي عم يمر بسرعة
بالنسبة لعمر فهمتو هبة حكي ستي وهو تفهم الموضوع وما بقى نتواصل مع بعض غير لما روح لعندون كنت شوفو بالصدفة وخصوصاً بعد ما بلش شغلو بالهندسة بس كل واحد بيناتنا مخبي حبو بقلبو حتى يكون حب صافي وما تلوثو النسمة .

ما بنكر صعوبة هالشي التعلق بروح بعيدة عنك بس هالشي بيخليني قاوم لحبو اكتر ويزيد اصراري اكتر واكتر.

كان ما ضايل غير يومين للتخرج انا وهبة حكينا مع الدكتور مشان مشروعنا وهو وافق وشجعنا على هالشي انا وهبة جهزنا ملفات عن كل الامراض الي رح نحكي عنا وكنا كل يوم نجتمع ونخطط لمشروعنا عنا او عندون وعأساس نعملو عشكل مسرحية بمسرح الجامعة يوم التخرج والي هو بكرا

هبة. لك تولين شبك حاج تحوصي بقا
تولين. ما بعرف كتير كتير متلبكة قولك رح ننجح رح يعجبهون مشروعنا
هبة. متأكدة انو رح يعجبهون حاج توتريني مشان الله
عمر. هاي كيفكون صبايا

تطلعت عالباب كان واقف عمر لوهلة كنا ساكتين بس عيونا لحالا عم تحكي كلشي عم تحكي قصص واشعار نحنا كنا عم نحكي بس ما حدا سامعنا

هبة. شبك اخي ليه لساتك واقف عالباب
عمر. آااه لا ولا شي طمنوني شو صار بمشروعكون
هبة. ان شاء الله كل شي تمام
عمر. ان شاء الله الله يوفقكون
تطلع عمر فيني بس هالمرة حسيت بعيونو حزن
وانتي تولين كيفك عالتخرج
تولين. الحمدلله غير شكل
بتردد تولين. وانت عمر كيف الشغل معك
عمر. اووه تمام
يالله صبايا ما رح عطلكون

مر اليوم بسرعة وصار وقت تنفيذ كل شي تدربنالو بهالفترة اليوم هو يوم تخرجنا كنت متلهفة كتير ،فرحانة كتير وخايفة كتير مشاعر مخربطة ما بتنوصف بس اهم شي تقدر تثبت نفسك بين كل هالمشاعر المخربطة

بلشت الناس تطلع عالمسرح وكل شخص كان عم يحكي عن مرضو وعن المعاناة الي بيعيشا صاحب المرض ركزنا على اكتر خمس امراض صعبة ومنتشرة بالعالم وانا بشخصيتي كنت عم احكي عن مرض السرطان الي نهب كتير اشخاص مننا كانو كل الناس مهتمين ليلي عم نقدمو وكان في كميرا عم بتصورنا

بنهاية التمثيل طلعت عالمسرح والقيت هالكلمتين( اعزاءنا اساتزتنا ومشاهدينا الكرام منتمنى يكون عجبكون الشي الي قدمنا مع انو كان نبذة مختصرة كتير عن هالأمراض بس بحب قلكون انو المرض هو مرض العقل مرض الجسد فينا نشفى منو بس العتب عمرض العقل الي عم ينتشر ويتمرد مع الأسف بدون علاج ومنتشكر متابعتكون كانت معكون تولين ومجموعة من طلاب الجامعة ...يسعد اوقاتكون)

وبعد ما قدمنا العرض والقى اعجاب الجميع اجت فقرة التخريج الي عم نستناها كلايتنا واخيراً صار الحلم حقيقة
__________________________
مدير الجامعة. وعلى ما سبق نخرج الطالبة تولين متمنين لها التفوق في حياتها العملية
__________________________

طلعت عالمسرح ومسكت شهادتي بأيدي مو طبيعي شعور النجاح عنجد هي احلا فرحة بالعالم ومافي شي بيعادلها تطلعت عستي الي كانو عيونها عم يدمعو من الفرح وعلى عمر الي واقف مع اهلو وعم يفتخر بنجاحي اليوم حاسة حالي ملكة هالمسرح والكل عم بيهنيني

بلشت اصوات التصفيق تعبي المسرح والكل كان مبسوط للطلاب الي تخرجو

هبة. كتير حلو ما عم صدق انو قدمنا بهالطريقة
تولين. هههه عنجد الف مبروك ياي شو فرحت انو عجبهون
هبة. الف مبروك تنيناتنا عالمشروع وعالتخرج
ام بكر. الف مبروك يا صبايا طالعين بتجننو اليوم

ام عمر. الف مبروك يا صبايا والله تعبتو ونلتو
عمر. الف مبروك بنات يالله جهزولي حالكون مشان تبلشو شغل
تولين. الله يبارك فيكون يا رب ونحنا جاهزين للشغل
هبة. الله يبارك فيكون بدنا التحلاية
عمر. مفكرين عم بمزح مشان الشغل عنجد حكا معي رفيقي وقلي بدو ممرضين للمستوصف الي بضيعتنا
هبة. يي عنجد اخي
عمر. اي والله ليش في بينا مزح
تولين. ياي عنجد ما عم صدق بهالسرعة هي عنجد ما توقعت
عمر. ههههه اي توقعي لكن الف مبروك
تولين. الله يبارك فيك يا رب

فيني قول انو عنجد احلى فرحة ممكن تصير بحياتك هي فرحة النجاح انك تنجح بشي كتير تعبت في شعور ما بينوصف بيخليلك تملك الدنيي كلا بينقلك لعالم تاني وبيعزز ثقتك بنفسك ،بتعتز بحالك وبقوة أصرارك وتماماً هيك كان شعوري لما شفت الفرح بعيون كل الي حواليي

بعد التخرج قررت اني ارتاح بالبيت لفترة صغيرة كنت ناطرة شي رسالة من عمر ، او شي يخليني استمر بحبو لحتى قرر كيف ارسم مستقبلي بالفعل هالرسالة اجت و بليلة تخرجي من الجامعة كنت متسطحة عتختي وعم أحلم بأيامي الجاية كيف بتكون لحتى رن الهاتف وقطعلي سلسلة أفكاري رفعت السماعة وحطيتا عأدني

تولين. الو
م. وفي نهاية نجاحك ،في قمة طموحك وفي كامل انجازاتك لا تنسى ان تتبع الطريق لمسار قلبك فلن يخذلك ابداً (رسالة من المجهول)
تولين. هههههه عمرررر انو كيف بيخطر ببالك هاد الكلام
عمر. هههههه وانتي صغيرة كنتي كتير تحبي هي الخواطر كنتي تضيعي مصروفك مشان تشتري هي القصص من المكتبة
تولين. ههههه ومين قلك هالحكي
عمر. ستك كانت تشكي عليكي قدامي 😅
تولين. طيب ما بتخاف تطلعلك ستي عالتليفون وتسمع هالكلام
عمر. ليش لخاف وقريباً رح اجي اخطبك
بصوت متقطع تولين. شوو؟!
عمر. قريباً كتير انتي انتبهي عحالك وتغطي منيح باي مجنونة

حطيت السماعة عقلبي وحضنتا بقوة ما بعرف ليه السعادة كلا عم تجي ورا بعضا عقلبي حاسة بأني اسعد انسانة بهالكون معقول يكون في ضريبة للسعادة متل ضريبة النجاح؟!

تغطيت منيح وحطيت راسي عالمخدة لغفيت براحة كبيرة ،بعمق ،بشعور حلو ولا مرة حسيتو من قبل وبسكون اول مرة بشعر في
تاني يوم كان لازم ارجع لحياتي العادية صار لازم كمل مهماتي وكمل لأسعى وانجح اكتر واكتر

فقت بكير على نسمات الراحة حطيت العباية عليي وطلعت لأتمشى بالحارة وعبي انفاسي من ريحة حجارها كان في نسمة هوا خفيفة عم بمشي لحالي بالشارع تطلعت عالمفتاح الي كان بأيدي ورحت عالمكان المجهول الي متعودة روح عليه رغم اني متأكدة انو ما حدا لاحقني بس مستحيل ما راقب الشارع قبل ما فوت لجوا

حطيت المفتاح بالباب وفتت كانو الزرايع دبلانين شوي فعبيت شوية مي وسقيتون ولما خلصت قبل ما فوت لجوا تمددت عالحصيرة الي قبال باب البيت وغمضت عيوني كنت عم حس بسواد فظيع عم شوف شي بشع كتير لحد ما تدايقت وفتحت عيوني بس السواد الي قبالي هلق طغى عالسواد الي كنت عم شوفو بأضعاف المرات

تولين. احمد؟؟!
شو عم تعمل هون؟؟
أحمد. كأنك ستغربتي او ما بدك تشوفيني
تولين. شو بدك
أحمد. ما بدي شي اساساً انتي الي بدك مو انا اجيت لهون وعندي معلومات يمكن تغيرلك كل مجرى حياتك
تولين. انا ما بدي شي ومعلوماتك احتفظ فيها لنفسك
أحمد. والي نايم جوا كمان ما بدو شي مو هيك!

حطيت ايدي عكتفو وهزيتو بقوة دفشتو عالأرض من دون حتى ما فكر كنت مستعدة اقتلو وادفنو بأرضو بهديك اللحظة

تولين. بقتلك وحياتك بقتلك
أحمد. مو قبل ما اخدمك هالخدمة ومو قبل ما خلصك من بعض ناس حواليكي........#يتبع

الحصيرة هي مدة محيوكة من خيوط بلاستيكية موجودة بكل بيت سوري بتوقع ويتم استخدامها خلال الصيف للسيرانات اوداخل المنزل وغالباً ما تنقش اليدين والرجلين بخطوط هندسية رائعة 🤭😂😂
#نبض_الحياة_بقلم_رومانتيكا
الجزء السادس...........

رجعت عالبيت وحاسة راسي رح ينفجر حاسة بشي ضاغط على انفاسي كأنو السعادة ما بدوم ساعاتا قصيرة كتير
كان حلم كتير حلو كان شعور ما بينوصف كان ابيض كتير بس صار لازم اصحى من حلمي، صار لازم اوعى على كابوسي الاسود وانتبه عحالي منيح .

اول ما فتت من باب البيت سمعت اصوات ضحكاتون الي عم يرن بأدني ومن بين هالأصوات قدرت ميز صوتا بصعوبة عرفت انو هي هون كانت ستي عم تطلع عليي ومستغربة من وضعي

ام بكر. توليين لك بنتي وين رحتي من الصبح ولهلق حتى رجعتي شغلتي بالنا
تولين. انا بخير
ام بكرا. فوتي تيتا غيري اواعيكي وعملي قهوة ولحقيني
تولين. قهوة شو ليش مين عنا؟!!
قربت لعندي والابتسامة معبية وشا وبصوت واطي ام بكر. خالتك ام عمر جاي لتخطبك لعمر
تولين. ههههه شووو!!
قوليلا ما عنا بنات للجازة والبنت بدا تكمل دراستا
ام بكر. لك شبك تولين مبارح تخرجتي بنتي فيكي شي
تولين. تيتا الشغلة بالغصب قوليلا ما بدي خلصنا بقا
ام بكر. وطي صوتك خلص فضحتينا فوتي عغرفتك
بصوت عالي تولين. لا تيتا شكلك ما عم تستوعبي عليي خالتي بدرية ابنك عمر ما بدي ياه ما بدي ياه خلصنا بقا تركوني بحالي حاج خنقتوني

بتزكر هي آخر كلمات طلعت من تمي ومن بعدا تناثر كل الحكي جواتي عم حس حالي خرسا ما بقدر احكي شي وكأني وانا عم اخلع قلبي خلعت كلماتي بالغلط ،ماني عم حس بشي غير بضلوعي الي تكسرت وبدموعي الي تمسكت وما عم تقبل تنزل وبروحي الي عم تطلع شوي شوي،بس جسدي ساكن ما ني عم حس في

ضل متجمد الشعور جواتي لثواني كانت اطول من دهر بحالو ومن بعدا ركدت عغرفتي وصرت صرخ بصوت عالي كلشي كان قريب عليي كسرتو ما خليت غير جسد هزيل وروح ضعيفة😔
كان يوم طويل بس مرق ومن بعد هاليوم انقلبت كل الموازين بحياتي فقت عكابوسي غسلت وجهي وعم حاول اتناسى الي صار هلق صار وقت الجد صار وقت المواجهة صار وقت ينعرف مين انا.

تولين. صباح الفل تيتة
ام بكر. توليين!!
كيف صرتي بنتي انتي منيحة
تولين. اي تيتة انا كتير منيحة انتي كيفك
ام بكر. من الله بخير شو ليش لابسة
تولين. ولا شي بس خلص قررت بلش شغل ما بتنفع القعدة بالبيت عالفاضي
ام بكر. بسسس ما صرلك غير كم يوم مخلصة جامعة
تولين. تيتااا انا هيك بكره القعدة تركيني عراحتي
ام بكر. طيب عراحتك بسس
تولين. بس شو
صحي تيتا اليوم جهزيلي حالك ورتبي الأمور جاي يخطبني رفيقي بالجامعة
بصوت عالي ام بكر. شوووو!!!
مستحيل شو تحكي انتي
جاوبت ببرودة تولين. تيتا هنن ناس من طبقة الهاي هاي فهمتي علي كيف يعني الشب كتير منيح وغني شو بدنا احسن من هيك
ام بكر. لككك تولين لا تجننيني شو بدي احكي لام عمر
تولين. ومين قلك تحكي شي لام عمر هي حياتي انا مو حياة ام عمر فهمتي عليي
ام بكرا. خلصنا بقا روحي عشغلك روحي

تركت تيتا عم بتصرخ وطلعت بكل برودة اعصاب بس كنت من جوا عم بغلي غلي كنت مستعدة اعصر قلبي بأيديي لحتى يخف الآلم بس مع الأسف مافي نتيجة😔

______________________
صرت عيد نفس المشاهد بعقلي
"ما وراء الكواليس"

تولين. أحمد شو بدك !!
لآخر مرة بسألك

قرب عليي لحتى صارت انفاسو البشعة كتير قريبة مني حط ايديه عرقبتي وبقلب بارد أحمد. ما بدي شي بدي ياكي انتي بس ما بدي منك شي صعب كتير يعني

تولين. اكيد اكل شي ضربة عراسك فيك هلق تطلع من بيتي

أحمد. ههههه هلق صار بيت المخدرات بيتك عنجد ضحكتيني ومالي نفس أضحك

تولين. مو شاطر غير تسمع حكي

أحمد. وحياتك مو بس حكي فيني طبق مثلاً وخلي نهاية اخوكي حبل المشنقة وفيني كمان طالع اخوكي بيومين يعني لو مثلاً صحي يلي نايم جوا ورجعتلو ذاكرتو وعرف انو اخوكي هو السبب بوضعو وبموت اخو بسبب تجارة المخدرات مفكرة رح يسقفلك ويضل ساكت ههههه اكيد بيتهيألك

بصوت عالي تولين. انا متأكدة انو انت مو بس تاجر مخدرات انت رئيس العصابة يا كلب

أحمد. احترمي الفاظك يا حضرة الممرضة المهم ازا بدك أخوكي يعيش ويطلع من السجن واتكتم عالقصة بدك تراجعي العرض الي عم بعرضو عليكي من سنتين

تولين. وشو الي بدو يثبتلي انو اخي رح يطلع او انك مانك عم تكزب مثلاً

وبعدين مانك قادر تعمل شي وين الاثباتات الي بتدل انو اخي هو الي قتلو ما يمكن يكون حدا تاني

زت ملف احمر قدامي أحمد. يا حضرة الممرضة اخوكي مو بس قتل هاد فيكي تشوفي هي الصور مثلاً

فتحت الملف الي زتلي ياه قدامي وتطلعت عالصور كنت ما عم صدق الي عم شوفو ما كنت متخيلة أخي بهي الوساخة ما كان عندي مشكلة انو يموت هلق بعد هي الصور بس لما شفت اخر صورة انصعقت كان عمر موجود فيها مسكت الصور وشقيتون ورميتون عالأرض

أحمد. مبالك ازا شقتيهون بتكوني خلصتي اخوكي ما عندي عشر نسخ منون
اي صحي و نسيت قلك انو كمان رفيقو شريكو بالجريمة يمكن كان اسمو عمر هيك بتزكر وكمان هرب لبرات البلد مشان ينكمش

تولين. انت كزاب كل حكيك كزب انا مستحيل صدقك عم تفهم

أحمد. مو المهم انك تصدقي المهم فكري كيف رح تنقذي حياة أخوكي😉

أحمد. وهي الاثباتات كاملة فيكي تتفقديها وتأكدي انو تاني يوم رح اخطبك في رح يطلع اخوكي

تولين. تأكد اني بكرهك وما رح فكر حبك بحياتي يا كلب

احمد. وانتي تأكدي العكس يالله باي بشوفك بعد أسبوع لحتى تصحي عحالك😊

___________________________

نفضت راسي من كل هالأفكار الي صرلا أسبوع عم بتدور براسي وكملت مشي لوصلت عالمستوصف الي بضيعتنا لقدم معلوماتي وملفي مشان اشتغل اول ما فتت حسيت الدكاترة عم يطلعو عليي بنظرة ما فهمتا

تولين. السلام عليكم
الدكاترة. وعليكم السلام
تولين. انا دارسة تمريض وتخرجت من كم يوم بدي بلش شغل وهي ملفي كامل
الدكتورة. انتي مو الطالبة الي طلعت عالتلفزيون وكانت عم تحكي عن مرض السرطان
تطلعت عليها بأستغراب ما بعرف ليه لما قالتلي انو طلعت عالتلفزين مع اني كنت شايفة الكميرات الي عم بتصورنا خلال العرض
تولين. اي تماماً انا هية بس ما بعرف انو عرضو التصوير عالتفزيون
الدكتور. وانا عم قول وين شايفك براڤو كنتو عم تقدمو بطريقة كتير حلوة
تولين. بتشكرك
الدكتور. اهلا وسهلا فيكي فيكي تبلشي شغل من اليوم ازا حابة ومبين عليكي انك نشيطة لانو ما صرلك غير فترة صغيرة متخرجة
تولين. اكيد. شكراً

بلشت شغل بالمستوصف انا بالواقع ما كنت بهاد النشاط الي عم يحكو عنو الدكاترة بس كنت مستعدة اعمل اي شي لاطلع من الكابوس الي انا في كنت عم حاول ركز عشغلي كتير لاتناسى

خلصت دوامي وطلعت من المستوصف كنت بطريقي عبيتي التاني او عبيت المخدرات متل ما قال أحمد فتت عالبيت لجوا وتطمنت عوضع الي نايم كان لساتو نايم من سنتين لهلق ما عم يستجيب معي قلي الدكتور انو يمكن ما يصحى بحياتو لانو واقع بغيبوبة دائمة بتزكر لما جت الشرطة على هاد البيت واخدت اخي كنت عم راقب من بعيد ولقيت واحد جريح بين الشجر لهلق ما بعرف شو قصتو وحتى ما كنت بعرف انو اخو مات قبل ما يحكي احمد بوقتا بتزكر اني كزبت عالشرطة وقلتلون انو هاد اخي وبما انو كان بغيبوبة دائمة سكرو المحضر بسرعة حتى قبل ما يتأكدو

اجى نظري عالصور الي مشقوقة عالأرض جمعتا بأيديي وحطيتا بجزداني وبعدين طلعت من الباب وكملت مشي عحارتنا حسيت فجأة بأيد عم تمسكني وتلفني لعندا تطلعت في بنظرة حقد وكيد

تولين. خير ليه هيك عم تشدني ولا لا تكون فكرتني اختك
عمر. صرلي من الصبح عم دور عليكي تولين انتي فيكي شي
تولين. وليه بقى عم تدور علي انا عم جهز لخطبتي
عمر. لخطبتك هيك بقى
تولين. ممكن تترك ايدي
تطلع عليي وعيونو عم يدمعو عمر. لاء ما ممكن ما بسمحلك تعملي فيني هيك ما بسمحلك تولين انتي الي وبس عم تفهمي
تطلعت في بحزم تولين. انا قلتلك من قبل اني ما بحبك ليش مصر تلاحقني قلتلك ما بدي ياك ما عم تفهم خلصنا بقى تركني بحالي انا بدي اتزوج واحد غني لحتى ما عيش معو بالذل والفقر عم تفهم.......#يتبع
#نبض_الحياة_بقلم_رومانتيكا
الجزء السابع............

دعست عقلبي ومشيت تركت عمر واقف لحالو بالشارع مسحت الدمعة الي واقفة عطرف عيني وكملت طريقي لوصلت عالبيت فتحتلي تيتا الباب كان بعيونا نظرة حزن واضحة حسيتا عم تعاتبني بس تجاهلت نظرتا

تولين. مرحبا تيتا
ام بكر. اهلين عملي قهوة وفوتي ضيفي اهل رفيقك بالجامعة
تولين. هنن جوا
ام بكر. اي
تولين. يالله جاية بس لبدل تيابي

فتت عغرفتي بدلت تيابي عالسريع وعملت قهوة مسحت دموعي بطرف ايدي حطيت بدالون ابتسامة مزيفة وفتت لجوا.
كان أحمد واهلو حسيتون عم يطلعمو عليي بنظرة حقد ومو عاجبهون شي وكأنو مجبورين على هالخطبة سلمت عليهون وقعدت جمب تيتا طول قعدتهن ما فتحت تمي بحرف طلبوني من تيتا ووفقاً للعادات والتقاليد عطوني مهلة يومين لفكر فيهون .

ودعونا وابتسملي احمد أبتسامة باردة ومشيو كأنو كان عم يقلي شوفي انا انتصرت عليكي انتي ضعيفة كتير استسلمتي ورضختي معي عالجحيم برجليكي ومن جنب تاني شفت عيون عمر يلي عم يلوموني ويقولولي ليش عملتي هيك لييششش؟!!
وعالطرف شفت تيتا مالا علاقة بشي مقهورة وزعلانة على مين ولا على مين بدي اطلع كيف بدي اقدر اتجاهل نظرات الكل كيف بدي خلص حالي من هالمعركة الي انا سببها وجنودها ونهايتها بدي بس طريق واحد يدلني عالخلاص😔

ام بكر. تولين شو رح نعمل هلق تولين. خلص بعد يومين بس يحكو معك قوليلون اني موافقة وخليهون يجو لهون اتفقو عكل شي
ام بكر. هيك يعني حاسمة قرارك وما بدك تفكري حتى
تولين. يعني هيك شي
ام بكر. طيب تولين روحي تغدي الأكل بالمطبخ
تولين. تيتا ليه حاستك مانك فرحانتيلي
ام بكر. لا مبلا فرحانة
تولين. طيب ما بدك تتغدي
ام بكر. تغديت قبل ما تجي
تولين. اوك ماشي

بعد ما تغديت تطلعت عالساعة ما كان معي كتير وقت لبست تيابي بسرعة وطلعت لحتى كون جاهزة عالموعد

ام بكر. تولين لوين رايحة
تولين. آااه اي تيتة رايحة لعند رفيقتي
ام بكر. مين رفيقتك هبة!!
تولين. لاء تيتا وحدة تانية ما بتعرفيها
ام بكر. طيب لا تطولي وتشغليلي بالي مفهوم
تولين. مفهوم تيتا

وقفت تكسة اجرة وطلعت لاول مرة رح روح عهاد المكان كان قلبي عم يدق بسرعة ومتوترة كتير غالباً كانت تجي تيتا لحالا ولا مرة قبلت روح معها كنت اتحجج اني بكره هاد المكان بس هلق صار الوقت اني روح واني اتغلب عكل الحقد يلي جواتي.

اول ما دخلت فوتوني عمكان كلو شبك بشع كتير هالشعور قلبي عم يدق بسرعة وكأني رح قابل حدا ميت من زمان كانت صوت دقات قلبي اعلى بكتير من طرقات الحديد ببعضو يلي عم بسمعها كل شوي وعم تزيد من توتري

اول ما فوتو كان لابس لبس غريب دغري نزلت عيوني عالأرض وكأنو ما بدي شوفو من بين الشبك قرب علي رفعلي راسي وتطلع ععيوني الي محمرين من البكا

سليمان. توليين!!
تولين........
سليمان. ما عم صدق اختي كيف كيف اجيتي لهون؟!
تولين. .......
سليمان. لو تعرفي شو اشتقتلك يا ربي ما عم صدق مو معقول اني هلق عم شوفك
طلعت الصور من جزداني تطلعت عليه بحزم تولين. بس انا ما اشتقتلك انا اجيت مشان هدول

وجهت الصور عليه وصرت قلب فيهون وحدة وحدة

تولين. شوف اخي تطلع عحالك منيح شوف أديه هالمكان مناسب لألك شوف هي مثلاً وانت عم تتحدا رجوليتك وعم تقتل الأطفال شوف هي الصورة كتير مبسوط عحالك وانت عم تبيع مخدرات بس انك تطلع تاجر اعضاء هههههه ما كنت متوقعة والله عشنا وشفنا شوف هي كمان انت ورفيقك التاني عمر

سليمان. منين جبتي هي الصور

تولين. ليش اخي شكلك اشتقت لهديك الايام مثلاً عم تسترجع ذكرياتك

صار يضرب أيدو بالشبك بقوة وبصوت عالي
سليمان. احمد النذل انا بفرجي لهالواطي

تولين. ممكن توطي صوتك شوي وممكن كمان ما تحكي عخطيبي ما بسمحلك تحكي عنو هالكلام هو مانو متلك عالأقل ياااا أخي

طلع ايديه من بين الشبك وصار يعصرهن بقوة
تولين. ممكن تترك ايدي

سليمان. تولين لا تعصبيني انتي بتعرفي مين هو احمد كيف بتخطبي كييف؟؟
تولين فهمي علي بيكفي تتهميني اتهامات باطلة لازم تعرفي الحقيقة

تولين. حقيقة شو فهمني ؟؟

سليمان. تولين انا صح تاجرت بالمخدرات ما بنكر بس لمرة وحدة بحياتي وكانت غلطة حياتي الي لهلق عم اتعاقب عليها هون بس كل الي عم يصير معي بسببو هو هو كان السبب او هنن كانو السبب

تولين. شو قصدك ممكن توضح

سليمان. انا لما تاجرت بالمخدرات كان عندي رفيقين هنن عمر واحمد

بصوت متقطع تولين. ققصدك عمر واحمد السبب

سليمان. لاء لاء تولين عمر ما دخلو بالقصة ابدا ابوكي السبب هو الي خلاني انضغط هو الي تركنا ونحنا بأمس الحاجة لألو
كان احمد عم يطمعني بالمصاري كان عم يقلي انو بتجرة وحدة بتتخلص من كل الديون الي عليك ومنو بتحافظ على بيت امك وما بتبيعو وبتفتك من ديونك

تولين. ههههه قصدك البيت الي استخدمتو للمخدرات

سليمان. كانت تجرة كبيرة كتير واحمد اقنعني اني حطون ببيت امي بس لتاني يوم لبين ما يجي واحد ويشتريهون كلون وهيك بكون كسبت البيت وخلصت من ديوني

تولين. اي وشو صار بعدين كسبت البيت ودخلت عالسجن

سليمان. كان احمد بس عم يقدملي المغريات بس ما قلي ابداً انو هي اخطر تجرة وانو ممكن انكمش وما حكا انو الشرطة عم تترصد لتلاقي مين ورا كل هالمصايب زتني طعم للشرطة ليصفي سمعتو ويزيل الشكوك عنو خلاني براس المدفع وقلي انو هو ما بيغضر يروح معي بهديك الليلة

تولين. ما بعرف ليه ما عم صدقك عنجد ماني قادرة مزالك صادق ليه ما حكيت هالحكي للشرطة

سليمان. لنفس السبب الي اجيتي في لعندي لهون بسبب هي الصور الي بين ايديكي هلق والي اجى وهددني فيهون تولين هادا واحد كلب برأيك لو قلت للشرطة شو رح يعملو انا انكمشت بقلب الحادثة اما هو شو ؟؟
رح يحققو معو يومين ويطالعو

تولين. طالما معك حق ف ليش خايف احكي

سليمان. انا ماني خايف منو انا خفت عليكون لانو كمان هددني فيكون انا مافي بأيدي دليل وازا هو سلم الصور للشرطة بكون ضيعت مستقبلي وضيعتكون معي عم تفهمي عليي تولين

تولين. عم تقول انك تاجرت بالمخدرات مرة وحدة قبل ما تنسجن افترض اني صدقتك الصور بتكزب شي؟؟

سليمان. اي الصور بتكزب ما هي الصور اساساً كلا تطبيق

تولين. اي وشو الدليل انو هالصور تطبيق

سليمان. ما هي هون المشكلة المشكلة انو مافي دليل بس تولين صدقيني انا ولا ممكن اعمل هيك شي انا صح غلطت بس ولا ممكن اني ساوي هيك شي بترجاكي صدقيني

تولين. طيب وشو مشان التنين الي قتلتون بهديك العملية واحد منون مات والتاني لهلق عم يعاني

تطلع عليي بنظرة استغراب سليمان. مين هاد الي قتلتو؟!!
تولين لا تجننيني احكي

بحزم تولين. ليه عم تغشم حالك ممكن تفهمني ليه؟؟
انت قتلت تنين خوات واحد رميتو تحت الشجرة ببيت امي والتاني الله اعلم وينو

سليمان. لحظة لحظة لايكون قصدك على الياس ومحمود

تولين. مين ما كانو المهم انك قتلت

سليمان. لك بس انا ما قتلتون وغلاوتك عندي ما لقيتون التنين كانو مشتركين معي بالعملية بس انا ما قربت عليهون صدقيني

تولين. شو يعني هلق ؟!

سليمان. يعني صدقيني ما بعرف انا عاجز هون ما بعرف شي رح جن

تركت سليمان عم يحكي مع حالو وطلعت لانو خلص وقت الزيارة

بلشت عيد بزاكرتي الاحداث الي مرقو بهداك اليوم من سنتين باليوم الي نسجن في سليمان بتزكر وقتا كنت عم راقب الشرطة برا البيت وبعد ما طلعو بنص ساعة فتت عبيت امي وصرت دور وراهون بتزكر اني سمعت صوت غريب وفجأة اختفى الصوت تزكرت كيف لقيت القتيل عالأرض واخدتو عالمشفى بلشت زاكرتي ترجع لورا وراجع ذكريات تمنيت بكتير من الأحيان تنمسح من ذاكرتي بس هلق شو الي عم يصير انا وين وكيف صار معي هيك ليش وقعت معهون وانا ما دخلني بالقصة ليشش؟؟
الف فكرة وفكرة براسي حكي مين ولا مين بدي صدق؟

تاني يوم الصبح وعيت على صوت الهاتف الأرضي كمان برسالة من المجهول بس هالمرة ابداً ما كانت نبضة حياة😔
"الفقر ابداً لا يمثل العقول بل يمثل كل شيء ومنها الأحساس والمشاعر"

فصل الخط قبل ما احكي ولا حرف ما قدرت دافع عن حالي ابداً قررت اني روح اتفقد ألياس لحتى ما فكر كتير لبست وطلعت بس الصدمة الي كانت عم تستناني هناك كانت اكبر من كل شي مر على راسي؟؟!

________________________
"بعد يومين"

تولين. ولييي على هالشوب رح موت يا ربي لساتنا بالربيع وهيك

تطلعت على ترمس المي الازرق وكاسة الكروم الي كانت معرقة وطرت عليها ولييي ما اطيب المي

ام بكر. هههه لك شبك شوي شوي شقد عطشانة
تولين. لك شو شقد رح موت من الشوب
ام بكر. صحة وهنا
تولين. شو قوليلي كيف طالعة
ام بكر. حلوة كتير يالله فوتي سلمي عالجماعة
تولين. يالله فايتة

فتنا انا وستي سلمت عليهون وقعدت جمب ستي كنت عم اسطنع دور البنت الخجولة الي طول الوقت بتأيد وبتضل ساكتة بعد ما اتفقو عالمهر وعالخطبة وعلى كل شي صار لازم يقرأو الفاتحة

ابو أحمد. يالله يا جماعة نقرأ الفاتحة عنية التيسير
تولين. لاء....
ابو أحمد. شووو!!....#يتبع

الترمس الأزرق وكاسة الكروم كمان موجودات بكل بيت سوري وغنيات عن التعريف مو هيك😜
#نبض_الحياة_بقلم_رومانتيكا
الجزء الثامن والأخير.........

وقفت وقربت عند الباب
تولين. عم يرن الجرس

الكل تطلع عليي بأستغراب بس اتجاهلت نظراتون وفتحت الباب لما دخلت الشرطة الكل استغرب الا انا وستي لانو كانت بتعرف كل شي

الشرطي. السيد أحمد ووالدو يتفضلو معنا
ابو أحمد. خير ان شاء الله شوفي
الشرطي. اتفضلو معنا وبالقسم بتفهمو كل شي
بكل ثقة ابو أحمد. طيب يا جماعة لكن قرأو الفاتحة ونحنا راجعين ما منطول منتفق عباقي التفاصيل لما نرجع
تولين. عمو انا برأيي نقرأ الفاتحة عأرواح الناس الي تسببتو بقتلا وبالمعية عروحكن بما انو رح تطلع قريباً
ابو أحمد. انتي فعلاً وحدة قليلة أدب
ام أحمد. انا ما بيشرفني اخطب هيك وحدة لأبني
الشرطي. اختي استاز نحنا ما جايين نضيع وقت هون تفضلو معنا احسن لألنا ولألكون
فجأة احمد وعي من صدمتو وصار يصرخ تولين. انا بفرجيكي يا تولين والله لتكون نهايتك انتي واخوكي على ايديي هيك لكن عم تغدرو فيني يا كلاب والله لحتى تصير كل الصور عند الشرطة
ببرودة تولين. حاج تصرخ مشان صحتك بس بحب طمنك انو الصور كلا صارو عند الشرطة يعني مافي داعي تعزب حالك طبعاً الصور الأصلية😉

كلبشوهون الشرطة من ايديهون واخدون عالسيارت بجية عمر وسليمان اي سليمان ليش مستغربين ههههههه
وقف سليمان جمب سيارة الشرطة ودقلو لأحمد عالشباك من ورا

سليمان. سلملي عولاد خالتي يا رفيقي يا صديقي الصدوق اي وكمان بدي قلك ازا مرقت من جمب حبل المشنقة سلملي عليه بطريقك...يلا ياااا أخيي

ركدنا انا وتيتا لعند أخي سليمان وحضناه بكل قوتنا تمنيت لو يوقف الكون عند هي اللحظة تمنيت اني ما اوعى رغم المسبات الي كانت عم توجها ألنا ام أحمد الا انو طنشناها وما ردينا عليها.

كان عمر واقف عجنب وعم يطلع علينا يمكن هو اكتر واحد تضرر فينا بهالكم يوم وحتى ما الو علاقة بالقصة بس هادا حال الدنيي بتخلينا نغلط على اكتر ناس منحبون ومنصير نوجهلون اتهامات ما الا اساس من الصحة بس بنهاية كل قصة لما توعى صدقني انت الي رح تكون كسبان لو ضعفت رح تقوى، لما تفشل كتير رح تنجح بجدارة ، ولما تظلم رح تنصف بنهاية المطاف هيك الدنيي بتاخد وبتعطي يعني لا تتوقع تعطيك بلا مقابل.

_____________________________
//ما وراء الكواليس//

تولين. يا ربي دخيلك هلق شو بدي ساوي رح جن يا رب تساعدني يا رب انا السبب كلو بسببي انا شو بدي اعمل هلق الأمل الوحيد الي كان رح يدلني عالخلاص هلق مات ليش يا الياس ليش هلق لمتت لييشش؟؟

كانو ايديي مربطين وماني قادرة اعمل شي كيف هلق رح ادفنو وادفن الامل الي علقتو في كيف رح اعرف الحقيقة كييف ...

صرت دور بهالبيت وطقطق بأصابيعي وعيوني غراقانة بالدموع بسبب هالورطة الي ورطت حالي فيها ويلي سليمان ويلي أحمد الي ورطت حالي في بساعة غضب وويلي الياس صرت فتش بهالجوارير على شي أثر ضالل من سنتين لهلق بس الي مجنني انو مافي أثر

فجأة تزكرت أواعي الياس اي اي انا حاطيتون بكيس بعد الحادثة صرت رجع بذاكرتي لحتى اتذكرت وين كنت مخبيتون
صرت فتش بجيابو وأرمي عالأرض لحد ما لقيت الدليل الي عم دور بقلب جاكيتو كان CD صغير نشفت دموعي ومسكتو بين ايديي معقول يكون هاد الخلاص؟؟
بس لما شغلتو ما عرفت انبسط ولا ازعل قلبي عم يتعصر من جوا بسبب هي المناظر بس لازم كون قوية لوقف قتل متل هدول الابرياء الي مالون ذنب بشي انا صح ما قدرت انقذ الي راحو بس عالأقل هلق صار بأيدي شي ينقذ حياة كتير مساكين صار بأيدي شي يخلصني من احمد للأبد بس ما تاري العقل المدبر هو ابو لأحمد والي اشترك معو بكل هالأعمال القذرة متلو

اخدت ال CD والأواعي الي ممكن تتحدد البصمات عليها او ممكن الشرطة تلاقي اي دليل انو احمد هو الي قتلو ورحت عالقسم قدمت أفادتي وعطيتون كل الاثباتات الي رح تكشف كل شي وحتى خبرتون على الياس وعلى كامل القصة وطلعوني لحتى يستدرجو أحمد لعندون ويتأكدو من الي قلتو .

اما بالنسبة لألياس اخدو جثتو بأخر الليل لحتى ما يتسببو بأي شكوك لأحمد

ضليت عم أمشي بالشارع لحد ما شفت عمر مرق من جمبي كان متل الغريب ما سلم علي ولا حتى تطلع كان عم يحسسني انو ما شافني

تولين. عمرر...
تولين. ممكن توقف شوي
عمر. تولين هي انتي!
شو بدك
تولين. عمر عنجد سامحني انت كنت ضحية بمعركة ما الك علاقة فيها
عمر. ههههه شو قصدك شو عم يتهيألك
متلبكة تولين. هههههه عنجد ما بعرف شو بدي قلك ما بعرف المشكلة انو لهلق لساتنا جوا اللعبة
عمر. ازا ما بدك تحكي شي
قاطعتو تولين. لاء مو هيك عمر هي الخطبة كلا لعبة لحتى اكشف الحقيقة والحمدلله انكشفت وهاللعبة رح تخلص قريباً
عمر. لحظة..لحظة يعني هلق عم تقوليلي انك كسرتيلي قلبي مشان لعبة..لعبة؟؟!
تولين. لا تحكم عليي قبل ما تعرف كل القصة صدقني مو متل ما مفكر بس ازا مهتم لتعرف احكي معي اليوم عالهاتف لانو بعد ما وصلت لهون ما بدي حدا يشوفني ويخرب كل شي عملتو

بعد ما رجعت عالبيت بشوي وبعد ما نامو الكل حكا معي عمر وخبرتو بكل الحقيقة بالاول انصدم من الي سمعو بس انبسط انو بالنهاية طلع سليمان مالو علاقة بشي سامحني لانو ما كان قصدي أأذي ووعدني انو يساعدني بكل شي للنهاية

___________________________

ام بكر. يا جماعة ليه لساتكون واقفين برا اتفضلو فوتو يا ولاد ام عمر اتفضلي
بعد ما فتنا لجوا تولين. خالتي ام عمر بعتزر منك لما صرخت عليكي هداك اليوم بسس
ام عمر. خلص هسس مافي داعي انتي متل بنتي واليوم قبل بكرا لازم نكتب كتابكون انتي وعمر
تطلعنا انا وعمر ببعضنا بعدين حمرو خدودي ونزلت عيوني عالأرض😊
ام عمر. شو رأيك اختي ام بكر
ام بكر. اي طبعاً موافقة نحنا منفصل وهنن بيلبسو ما بقى في عناد من هون وهيك
سليمان. يعني فينا نقول الف مبروك😉
مع اني مو فهمان شي
عمر. ههههه اي طبعاً فيك الله يبارك فيك شريك ومو ضروري تفهم
حطيت ايديي ععيوني وانا لسا واقفة ومصدومة من الي عم يصير وقبل ما اهرب
تولين. رح اعمل قهوة
هبة. هههههه هربت
عمر. تركيها ولو خجلت
سليمان. لا يا حرام انت ما خجلت تطلع عخدودك😂
ام عمر. خلصنا يا ولاد حاج مناقرة طيرو هاتو الشيخ ورجعو تناقرو قد ما بدكون
عمر. عنجد أمي هلق🙄
ام عمر. اي هلق لساتكون واقفين خلصونا بقى
سليمان. ههههه امشي امشي أوامر من السلطات العليا

هربت عالمطبخ
هبة. لك هبلة لا تساوي شي راحو يجيبو الشيخ
تولين. شوووو؟!
شو عم تحكي
هبة. ههههههه اي شبك ليه استغربتي خير البر عاجله
تولين. اتفضلي لكن ساوي القهوة انتي انا فايتة زبط حالي
هبة. مع اني زعلانة منك لانك كل هالفترة ما سألتي عني بس يالله المعاملة مع الله😒

فتت عغرفتي وتركت هبة عم تحكي مع حالا لبست وزبطت حالي لأستقبلهون ما كنت متوقعة الأمور تمشي بهالسرعة هي بعد ما اجى الشيخ قرأنا الفاتحة وكتبنا كتابنا كل شي مر بسرعة وساعات مرقو متل لمح البصر الحلم صار حقيقة برفة عين عنجد انا شخصياً مو مصدقة

//رن الهاتف الأرضي//

تولين. الو
عمر. تولين طلعي عالسطح بسرعة بسرعة
تولين. خير عمر شبك شوفي
بصوت عالي عمر. عم قلك طلعي بسرعة

كنت لساتني لابسة الفستان الي لبستو بكتب الكتاب حطيت عراسي حجاب وطلعت بسرعة

تولين. عمرر خير شوفي شغلتلي بالي
عمر. بتعرفي انو هالفستان كتير لابقلك بس ضبي شعرك منيح😬
تولين. هلق طالعتني لهون كعير مشان تقلي هالكلمتين
عمر. لاء طالعتك لاني اشتقتلك😍
قرب عليي و ضبلي شعري بقلب الحجاب
تولين. عمرررر
عمر. مجنونة صرتي مرتي خلص انكتب كتابنا
تولين. ولوو
عمر. ههههه
تولين. عمر شوف القمر اليوم شو حلو
عمر. كل شي حلو اليوم
تولين. دخلك ما اجتني شي رسالة من المجهول اليوم
عمر. مبلا مجهولك بيقلك انو بيحبك وبيموت من دونك والحب هو
هبة. بسسسسس لقصتكون
بصوت واحد تولين وعمر. هبةةةةة😡

الحب هو الحياة هيك مجهولي كان بدو يقول ومجهولي كان عهيئة نبضة حياة الي كانت كل ما اغفى توعيني عشي حلو مع اني بكره النهايات بس هلق وتحت ضو القمر بين النجمات وسواد الليل بعد الحزن والفرح وبعد الدمعة والضحكة صار فيني نزل الستار واعلن النهاية رح قلكون انو قصتي خلصت هون و بهاد المكان قد ما كابرنا بس بأخر المطاف في نهاية انت بتحددها سعيدة او حزينة😊.....#النهاية